A DALILIN GATA Page 26-30

A DALILIN GATA Page 26-30
.

Alamein gaba Alh yana biye dashi suka shigo falon, karaf idon su suka had'e guri d'aya inda Dad ya yi mutuwar zaune, idon shi ya fara murzawa domin tabbatar da ba mafalki yake yi ba, bud'ar bakin shi kenan zai kira sunan shi wani irin tari ya taso mai, yi yake yi ba k'akk'auta wa, da saurin Alamein ya taso ya dafe mai gaba had'e da jero mai sannu ba adadi, Mum ce ta mik'o kofin ruwa Alamein ya bashi.

"Dad ka kwantar da hankalin ka duk abinda ake ciki munsani kuma insha Allah komai zai zo normal", Alamein kenan dake son kwantar wa Dad da hankali, saboda tsorace yake kar ciwon shi ya tashi. Cikin ikon ubangiji ba wani abu na tashin hankali daya samu Dad, sai dai daka ganshi kasan juriyar da ke tare dashi ba tashi bace shi kad'ai sai da ya aro wata. Mum kanta hankalin ta tashe yake, hakan dai ta jure ta baje ma Alh Ibrahim kayan motsa baki da abinci, bayan gaishe-gaishe ne na yaushe rabo Dad ya kai duban shi ga Alh Ibrahim had'e da furta "muna zaune kawai sai ga sak'on rasuwar ka ta risk'e mu, wanda bamu yarda da hakan ba sai da na garzaya da kai na kurmi sannan aka tabbatar min da hakan, sai kuma yanzu gashi ka dawo, meke faruwa halan?".
   Gyaran murya ya yi sannan ya fara basu labari kamar haka, "lokacin da wutar ta tashi gidan gaskiya bana ciki na fita siyen tea bakin titi, saboda akwai wani da Allah ya had'a jinin mu dashi wato Alh D'anjimma wanda kusan tare muke lamurran mu dashi, duk wasu abubuwa tare muke yi".

"Daren da wannan abin ya faru kuwa, muna kwance ciwon ciki ya taso ma Alh D'anjimma inda ya tada ni yake gayamin, hakan ya yi silar fita ta domin in sawo mai tea, don na ga koda ya kwanta bai ci komai ba, bayan na siyo mai tea ne na nufo hanyar dawowa kawai naga gidan ya kama da wuta sosai, wanda tsabar rud'ewa tasa na koma titin ban shirya ba, banyi aune ba kawai mota tayi watsi dani gefen hanya, nan mutumen ya fito yana neman agaji kan a taimaka mai amma ina hankalin mutane ya yi gurin ceton rayukan mutane da wuta ke ci, hakan mutumen ya cicci6e ni ya saka a mota daga hakan bansan me ya faru ba saboda loosing memory na da nayi, ina tare da wannan mutumen daya zamo ubangida a gare ni a cikin garin Abuja wanda na yi nema tare dashi har Allah yasa na samu d'an abin hannu na".

"Bayan y'an shekaru ne ya aura min d'iyar shi Binta wacce miji ya rasu ya bari da d'iya biyu tagwaye har sun girma, bayan auren mune muka samu k'aruwar yara uku wanda har lokacin bana tuna komai a rayuwa ta ta baya".

Daga baya ne ubangida na kuma siriki na Alh Usman ya aike ni Lagos gurin wasu harakoki na shi a hanyar dawo wa tane na samu hatsari wanda bayan farfad'owa ta na dawo hayyaci na, lokacin Husain da siriki na na gefe na ina masu kallon rashin sani, bayan an sallamo ni ne yake min bayanin abinda ya same ni".

"Bayan sati d'aya da hatsari na ne nake yawan mugun mafalkai wanda na rasa gane masu, sai dai suna tsorata ni sosai kuma abin yana da nasaba da abinda ya faru sama da shekaru Arba'in da suka wuce, sai yanzu nake hango illar abinda na aikata wanda son kai da rud'in shaid'an ya kai ni da aika ta hakan, sanadiyyar hakan yasa tunanin komawa gida ya dawo kai na, da hakan na gayawa suriki na zan je gida in dawo, daga nan na zarce asalin garin mu sokoto na yita bincike har na gano dangi na na asali, inda na nemi yafiyar gagarumin laifin da na aika ta zuwa gare su had'e da alk'awarin gyara akan( *BABBAN KUSKUREN DA NA TAFKA*, SIS RASH KARDAM)".

"A gurin kasuwanci muka had'u da Alh Taheer inda naji Jega rad'am a bakin shi, nan hira ta 6arke tsakanin mu har nake tambayar shi ko yasan ka, yake gayamin kai abokin shi ne, da hakan na kar6i lambar ka wanda gashi Allah ya yi had'uwar mu yanzu".
   Kowa falon ya jinjina wannan labarin na Alh Ibrahim, sannan Mum ta bashi nasu labarin bayan tafiyar shi, da hakan ya jajanta masu k'addarar da ta hau kan su, wanda har ya fara zargin kan shi da yana da nasaba da abinda ya samu Dad.

Cikin nadama k'arara a fuskar shi yakai duba zuwa gare su yana mai cewa "ina mai baku hak'uri da abinda ya faru, saboda bazai rasa nasaba da abinda na aika tane ya shafe ku ba".
    Cikin rud'ani da tashin hankali suka sako mai ido caaaa, wanda ya kasa had'a ido dasu ya nok'e kan shi k'asa.

.........
     Cikin rawar murya da fargaba Alamein ke jero mai tambayoyi, wanda bayan ido da Dad ke saki bai da wani abu da zai iya furtawa akan mutuwar jiki, inda dama tun shigowar Alh Ibrahim kawo yanzu kalma guda bai samu furtawa ba.

Nan Alh ya cigaba da bada labari kamar haka, "kamar yanda na gaya maku ni d'an sokoto ne to haka abin yake, asalin zamana nan Jega da kuma dukiyar da na barma na k'ara gaba to ba tawa bace hakk'in marayu ce".

"Kamar yaya, bangane ba", wannan karon Dad ne ya yi k'arfin halin jero mai wannan tambayar cikin tsananin tashin hankali.

"Mahaifin mu ya kasance mutum ne mai dukiya a wancan lokacin, matan shi uku da yaran shi goma sha biyu, na kasance ni kad'ai gurin mahaifiya ta kuma ita ce ta farko a gare shi, ta biyu keda yara bakwai ta k'arshe kuma yara hud'u. Allah ya yiwa mahaifiya ta rasuwa tun ina da shekara bakwai a duniya sanadiyyar hakan na tashi wulak'ance a gidan wanda dai-dai da abinci sai mak'wabta sun bani ko kuma gidan abokai, da hakan na tashi har na girma ba wani canji na zamantakewa ta a gidan, ana hakan ne ciwon ajali ya kama mahaifin mu sanadiyyar hakan yaga cewa nine babba a cikin yaran shi yasa ya damk'amin duka kaf dukiyar shi a zuwan in rai ya yi halin shi in nemi malamai a raba mana gado, lokacin haukar k'urciya yasa na gudo da kud'in kaf saboda tunani na ta hakan ne zan d'ebe takaicin k'iyayyar da matan mahaifi na da y'an uwa na ke nuna min".

"Haka kawai raina ya bani in gudo Jega da zama, da hakan na shigo garin ina y'an sana'o'i na har Allah ya rik'amin wanda daga baya ne muka had'u dakai har mutunci mai k'arfi ya k'ullu, lokacin da abubuwa suka faru har na d'auki dukiya ta duka na baka nabar gari, wani k'anen mahaifi na ne yaji inda nake har ya aiko sau biyu yana nema na, hakan yasa na had'a komai na baka na yanke hukuncin zuwa gari mai nisa don ma kar aji labarin inda nake".

"Daga bayan nan ne nake ta mafalkai kan mahaifin mu na takure cikin k'abari yana rok'o na kan in d'auke mai wani k'aton dutse dake saman kanshi, ko in ganshi yana cemin wannan ce amanar da na baka. Da hakan hankali na ya yi mugun tashi kuma naji ina so in je gida sannan in dawo nan in kar6i hakk'in marayi in kai masu".

"Abinda yasa na furta ina da sila da abinda ya shafe ku kuwa shine, hakk'in marayu bazai ciyu kuma a zauna lafiya ba, saboda dukiyar kaf banda ko kwabo cikin ta in ba an raba gado bane an bani hakk'i na, saboda haka ina mai baka hak'uri da abubuwan da suka faru".

Nan kowannen su ya nisa had'e da jimamin wannan tarihi na Alh Ibrahim, nan aka yi lisafi kan abinda ya bada sai gashi kaf har kud'in gidan Alamein sun shige ciki kuma ana neman k'ari, sanadiyyar kud'in can baya sun fi na yanzun daraja sosai, hak'uri suka bawa Alh Ibrahim kan cewa yabari gobe yadawo za'a had'a kud'in, da hakan ya fice daga gidan.

**********

Ba k'aramin tausaya masu yayi ba kan k'addarar da ta hau Kansu ba, har ga Allah yana so yataimaka masu, amma yafi so ya raba su da lalura in yaso daga baya ya taimaka masu, saboda tabbas dukiyar maraya cin ta lalura ce, shi kanshi baiji dad'in abinda ya aikata ba, don da ya mutu hakan baisan da wanne ido zai tsayu gaban ubangiji ba, da hakan ya yi alk'awari a ranshi cewa da an raba gado an bashi nashi kaso zai dawo yakawo ma Dad saboda sun yimai halacci a zaman takewa musamman Baban Maryam wato Mum inda ya zamo tamkar mahaifin shi sanadiyyar amintakar shi da Dad.

*********

6angaren su Mum kuwa sabon nazari aka shiga ta neman mafita, "gaskiya Dad mutumen nan bai yi halacci ba, yanzu duk zaman takewar da kuka yi bazai iya yafe sauran kud'in da babu ciko ba?". Alamein ke wannan maganar cikin kumfar baki.

Murmushi Dad ya yi had'e da girgiza kai sannan ya furta "Son ko da yace ya barmin bazan yarda naci ta ba, musamman yanzu dana san cewa hakk'in marayu ce, yanzu abinda nake so dakai gobe kaje kasa ka motoci na biyu kasuwa, nasan za suyi saurin shiga tunda sabon shiga ne, kabar min d'ayar ta ishe ni lalurar yau da gobe".

Baki ya bud'e da niyyar yin magana hannun Dad ya dakatar dashi, "kayi yanda nace kawai", yana maganar yana murmushi, da hakan ya tashi ya koma d'akin shi ya bar su jugum a falon.

..........
Washe gari Alamein ya samo mai siyen motocin Dad saboda suna sabon yayi don kaf garin Jega su biyu ke da irin motocin, da hakan aka kammala ma Alh Ibrahim kud'in marayi aka bashi ya wuce da alk'awarin sai sun ganshi.

Iya damuwa Mum da Alamein sun shiga wanda ya zamo Dad Allah ya sako mai tawakkalin da basu yi tsammani ba don shi ya zamo mai rarrashi a gare su, (ohhh! Duniya juyi-juyi kwad'o ya fad'a ruwan zafi, abin da mamaki wai liman ya auri karuwa).

A cikin ran shi gaba d'aya ji yake yi ya tsani dukiyar shi duk da ya biya hakk'in marayi, sai yana ganin d'an abinda ya yi saura hannun shi tamkar wata k'addarar za ta iya fad'a mai nan gaba. Da hakan dai ya kwantar masu da hankali kowa ya kama gaban shi had'e da tunane-tunanen miye mafita.

***********

Bayan kwana uku ne da faruwar wannan lamarin Zajlah na d'aki tana wasu d'inkuna da Shema'u ta kawo mata Alamein ya shigo d'akin wanda ko sallamar shi bata ji ba ganin shi kawai ta yi gaban ta, d'an zabura ta yi alamar razana.

"Lallai na tabbatar in kina d'inki ba ki jin motsin mutum, sau uku ina sallama shiru".

Gaida shi ta fara yi sannan ta d'ora da cewa "wallahi banji bane", hakan ya samu gefen katifar ta ya zauna ya yi shiru, ganin hakan ita ko ta basar ta cigaba da d'inkin ta.
    Ido ya zuba mata yana kallon yanda take sarrafa keken d'inkin sannan ya furta "ah ashe k'afa ta yi sauk'i tinda har ana iya d'inki da ita", "eh ai tin ranar ta yi sauk'i".

Daga hakan kowannen su ya yi shiru saboda rasa takamemen me za'a fad'a, d'azu ne Salis ya kira yake gaya mai Salmat jiki ya yi tsanani kullum cikin amai da k'arin ruwa take, nan yake jajanta mai had'e da gaya mai za su shigo duba jikin na ta, to shine yanzu yake son gaya mata ta shirya suje amma ya rasa ta ina zai kamo zancen, shine yake ta kame-kame.

"In kin k'arasa aikin zuwa bayan azzahar kishirya muje duba jikin Salmat, d'azu Imran ke gayamin bata ji dad'i ba kwana biyu".

"To" ta amsa a gajarce ta cigaba da d'inkin ta, hakan ya sa ya ja jiki sum-sum ya fice daga d'akin kamar wani munafuki.
    Ranar da za suje yiwa Baban ta bankwana kawai ta yi mata sak a rai, "ai ko giyar wake nasha bazan k'ara siyo ma kaina wulak'anci ba, hanyar mota daban ta jirgi daban", hakan ta furta a fili sannan ta yi wani gajeren murmushi na tunawa da message d'in da ya yi mata bata San ya za ta bud'e ba har yaci zalin ta ranar, saboda in har bata manta ba ranar da Salmat da Yusrah suka zo gurin ta har soyayya ta k'ullu tsakanin Salis da Salmat to ranar ne Yusrah ta koya mata yanda ake text message, don ba wai wasik'ar ce bata iya ba a'ah kan wayar ce bata sani ba, wanda sai ranar ta bud'e message d'in da ya turo mata.

*********

Tana gama girkin tane ta d'iba ta kaiwa Mum, saboda dambun shinkafa tayi Wanda ya ji kayan had'i da zogale, dama in tayi girkin marmari tana kaiwa su Mum, nan take gaya mata za taje ganin Salmat bata jin dad'i hakan ya sa Saudat tace tana zuwa suka fice tare, saman titi suka samu napep suka wuce.

*********

6angaren Alamein kuwa har ya dawo daga masallaci ya yi wanka ya kimtsa bai ji motsin Zajlah ba, hakan ta sa ya je d'akin ta, amma ga mamakin shi yana murd'a k'ofar ya jita rufe. Part d'in Mum ya wuce bayan sun gaisa yake ce mata ina Saudat halan?, amsa ta bashi da cewa ta raka Zajlah gidan Salmat, hakan ya ja motar shi ya wuce mamaki fal ranshi, amma kuma yasan wani 6angare tana shakkar fita dashi ne saboda gudun wasu abubuwan, amma duk zille-zillen ta bazai bari ta dawo a napep ba.

**********

Shigar su gidan kenan ana cire mata k'arin ruwan da aka saka mata, nan suka mata sannu suka zube a falon, wanka ta shiga ta fito duk ta jeme kan laulayi, dambun da Zajlah ta zo mata dashi ne ta saka mata, kad'an ta ci taji zuciyar ta na tashi ta ajiye, duk tsiyar da Zajlah ta so yi mata ta rushe saboda ta tausaya mata ganin yanda ciki ya mayar da ita gwanin tausayi.

Suna zaune suka ji shigowar Salis da Alamein, a falon suka zube duka, "lahhhh Brother za ka ma zo baka gaya mana mu jira kaba?", fad'ar Saudat.
    Ido ya bi Zajlah dashi suna had'awa ta nok'e kai. Alamein ne ya yiwa Salmat ya jiki had'e da mamakin yanda bakin ta na tsiwa ya mutu. Sai bayan la'asar ne Imran ya kawo Yusrah, nan suka baje ana ta hira inda mazan suka fita.

Bayan isha'i ne suka shigo gidan su uku, abinci suka ci sannan kowa ya yi haramar zuwa gida, inda Alamein ya kasa ya tsare wanda ya sa dole Zajlah ta bishi ita da Saudat suka koma gida ba don taso hakan ba.

.........

Awanni sun wuce kwanaki sun wuce wanda abubuwa da dama sun faru, su Mum  an fara shiga rayuwar k'unci komai sai manage, da hakan aka sallami duka y'an aikin gidan saboda zaman su na k'arin wasu abubuwa Mama Talatu kawai aka bari.

*********

Yanzu ne take ganin ya dace ta taimaka ma Alamein saboda ko mota babu hannun shi, abincin gidan kanshi ya sauya, saboda ga nasu yanayin kuma ga yanayin k'asa wanda ya shafi kowa, duk inda ka zaga za kaga gidan da aka saba tafiyar da abubuwa 80% yanzu sun dawo 40% saboda yanayin k'asa, abin kawai sai addu'a.

********

Bayan sun karya ne ta Shiga gyara d'akin Alamein kamar kullum, zaune ta isko shi saman kujera ya yi zugum ya saka takardu gaban shi ga alama yana cikin damuwa.

Nan ta gaida shi ta wuce ta fara gyara k'uryar d'akin, ko da ta fito falon yanda ta barshi hakan ta tarar dashi, guri ta samu ta zauna sannan ta tattara dukan nutsuwar ta guri d'aya sannan ta jefo mai magana kamar haka, "meke damun ka haka?, bai dace ka saka ma ranka damuwa ba, kar ka janyo wani ciwo na daban".

Hankalin shi ya maida zuwa gare ta had'e da cewa "ya zanyi da raina kusan sati d'aya ina yawon neman aiki ban samu ba, kuma gashi takardu na sun yi kyau amma abu ya gagara".

"A tunani na me zai hana a ajiye neman aiki gefe d'aya a kama kasuwanci?, kana ganin yanda k'asar ta zama yanzu, way'anda ke saman ma tsige su ake saboda bincike ina aka ga damar d'aukar wasu ma'aikatan?".

Zurum ya yi baice komai ba saboda tuna lokacin da ya kori wani daga ma'aikatar su akan bada shawara kan cigaban su, inda ya tuna lokacin da yake neman yafiya gare shi kan yabar shi ga aikin shi wanda ko sauraren shi bai yi ba ya wuce, hakan ya sa ya ji tausayin kanshi da kan shi kan yanayin da yake ciki sai ga hawaye  shaaaaa.

Ba k'aramin rud'ani ta Shiga ba ganin yanda hawaye ke ambaliya a fuskar shi, zumbur ta mik'e ta koma d'akin ta sai gashi ta dawo da wata leda bak'a a hannun ta har lokacin hawaye yake yi, gaban shi ta je ta durk'usa had'e da mik'a mai ledar, handkerchief dake hannun shi ta kar6a tana shafe mai hawayen dake ambaliya a fuskar shi, saboda Zajlah akwai raunin zuciya.

Ledar ya kar6a ya bud'e, abinda ya gani ne ya sa ya tayar da kanshi cikin mamaki yana mai kallon ta, bud'e baki yayi zai yi magana ta yi mai alamar yayi shiru, nan ta d'ora da cewa "kayi shawarar wace Sana'a ce ta dace dakai, na baka su halak malak".
   Sakin bakin da Alamein ya yi yana kallon Zajlah ne har ta 6ace ma ganin shi ya sa na lek'a ledar na hango kud'i, wanda duk iya biyar kwakkwafi na na d'aukar rahoto naso insan ko nawa ne don in feso maku amma abin ya gagara.

Ledar ya k'ara lek'awa had'e da murza idon shi don tabbatar da abinda yake gani cikin ta, hawayen idon shine suka k'aru sai kuka yake yi tamkar wani yaro.

Kud'in ya d'auko ya nufi part d'in Mum ya tarar tana d'akin Dad, nan ya shiga da sallamar shi suka amsa sannan ya shiga, kud'in ya ajiye gaban su had'e da yi masu bayanin inda kud'in suka fito, dukan su baki suka sake suna masu tarabbabin yanda matar shi ta zamo mai halarci a gare shi duk da irin cin fuskan da ya rik'a yi mata.

"Je ka kiramin matar taka", cewar Dad.

Mum ce ta mik'e tana mai cewa bara ta kira ta da kanta, da hakan ta fice har part d'insu ta sako Zajlah gaba, wanda har ga Allah bata so yagayawa iyayen shi wannan abin ba, ta so yabar shi tsakanin su. Cikin jin kunya ta shiga falon ta nemi guri ta zauna tana mai gayar da Dad had'e da yimai ya jikin kanta na nok'e k'asa.

Gyaran murya Dad ya yi bayan ya kar6a mata sannan ya furta "na ga alkhairin da kika yiwa Son, muna masu taya shi godiya, amma zan so ki gayamin ta wacce hanya kika samu wad'annan kud'in?".

Nan ta yimai bayani kan cewa kayan d'akin ta ta saida sai kuma na d'inkin da take yi ana biyan ta. "Ai ko bai dace ki sai da kayan d'akin ki ba, da ki bari ak'ara duba abinda ya dace don har ina shawarar saka mota ta kasuwa musan abinyi".

"Dad wallahi babu komai, a dai saka mana albarka a cikin abinda za'a fara dasu", daga hakan ta tashi sum-sum ta koma falon Mum.

Kowan nen su ya yi jugum saboda gaba d'aya ta kashe masu jiki, don basu ta6a tunanin hakan daga yarinyar ba, nan dai suka tattauna abinda ya dace Alamein ya yi da kud'in.

(Ni dai Jegal na yita baza kunne inji ko za su fad'i adadin kud'in da Zajlah ta bawa Alamein amma shiru abin tamkar had'in baki, don na hango su Hindatu shehu da Fati Salihu ana baza kunne, _lolx_).

.........

    Sana'a ya fara gadan-gadan inda ya shawarci Dad kan yayi zaman shi ya huta shi zai tashi da nema yanzu.
   Duk inda yake yanzu da tunanin ta had'e da muradin sauraren muryar ta yake, wanda sai ya ganta hankalin shi ke kwanciya, amma ya lura da ita yanzu wani basarwa take yi, bata cika shiga sabgarshi ba, asali ma indai ba d'inki take yi ba to tana part d'in su Mum don wani lokaci daga can za'a saka masu abinci ko da zai shigo gidan har ta rufe d'akin ta ta yi kwanciyar ta, hakan ba k'aramin damun shi abin yake yi ba.

*********

Yau gidan su ta shirya za taje saboda ta kwana biyu bata je ba, nan ta dad'e tana hira da mahaifinta har yana k'ara yi mata nasiha kan hak'uri da halin da suke ciki har yana yi mata nuni da kowane bawa bazai kaucewa k'addarar shi ba, kuma ta rik'a mijin ta hannu biyu ta girmama iyayen mijin ta.

Bayan magrib ne aka aiko yaro ana sallama da Malam Abu, ita ko lokacin za ta shiga gurin Mama Inno ta yi mata sallama don tana son wuce wa gida, abin mamaki motar Dad ta gani k'ofar gidan su wanda ta yi mamakin hakan a ranta, sai kawai ta dake ta fad'a gidan su Salmat saboda tunanin ba shi kad'ai ne mai irin motar ba.
     Tana zaune suna hira da Mama Inno sai ga Naja'atu ta shigo da gudun ta tana gaya mata Baba yace ta fito ga mijin ta ya zo d'aukar ta, sai da safe ta yiwa Mama ta fice daga gidan tana ta mamakin wai Alamein ne ya zo d'aukar ta yau, mamakin ta bai k'aru ba sai da ta ganshi da Baban ta suna hira cikin girmamawa da mutuntawa, hakan ta shiga gidan su ta yiwa Mama Asabe sallama ta d'auko jakarta ta fito, nan Baban ta ya shige gida.

Gudun ta shiga gaban ta janyo ma kanta ya sa ta je bud'e k'ofar baya amma ta ji ta rufe, gaban ya bud'e mata sannan ta shiga badan ta so ba. Yau ko gaisuwa bai samu daga gare ta ba sai wani cin magani da take yi, saboda bata ma son irin yanda yake bibiyar ta kaita unguwa ko d'auko ta, wayar ta ta fitar had'e da kunna data tana charting.

Warce wayar kawai ta ji ya yi sai ta bishi da kallo kuma ta sadda kanta k'asa, saboda bata iya jurar had'a ido dashi. Wayar ya rik'a bincike ya ga group uku, na make up, mu koma kitchen sai musha karatu, contacts kuma Salmat, Saudat, Yusrah sai Shema'u ya gani.

"Kasan dai bincike ba kyau, kabani waya ta", cikin zumb'uro baki take maganar had'e da mik'o mai hannu.
  Wayar ya mik'a mata tana mik'o hannu ya rik'e ya d'ora saman sitarin motar yana murza yatsun ta, abinda ya tsirga masu lokaci guda yasa ya yi saurin sakin hannun na ta sannan ya d'ora mata wayar saman cinyar ta, daga hakan ba wanda yak'ara magana har suka iso gidan.

K'ofar motar ta rik'a za ta bud'e ta ji ta gam, sai da ya fita ya zaga ya bud'e mata k'ofar ya rik'o wayar ta da jakar ta inda har ta ji nauyin Baba maigadi daya bud'e masu gate, (nidai Jegal hab'a na rik'e nace sabon salo kiran sallah da usur, ina ruwan neman gindin zama, _lolx_).

*********

Ya dad'e yana bibiyar ta tun lokacin da ya rasa Zajlah lokacin tana zuwa school of health. Ko da ya yi tafiya ya dawo ne yake tambayar wani friend d'in shi dake aiki B.L.B plaza kan cewa ya dai na ganin yarinyar, nan yake bashi tabbacin sun k'are makarantar, bincike ya yi har ya gano gidan su yarinyar, inda bai son a kuma samun matsala ya rasa yarinyar saboda ya yaba da hankalin ta had'e da nutsuwar ta, sai dai ga alama za ta d'anyi ji da kai irin na masu kud'i.

Hakan dai ya ji ta kwanta mai a rai, da hakan ya gayawa iyayen shi kan yana so aje mai tambayar neman iznin ganawa da yarinyar.
   Manyan shi basuyi k'asa a gwiywa ba suka je gidan su yarinyar inda kuma magabatan ta suka bashi damar shigowa ya gana da yarinyar.

************

Tun da aka gaya mata cewa za tayi bak'o ta shirya tsab sai zaman jiran ganin bak'on na ta. Ba'a fi minti goma da shirin ta ba sai gashi an aiko tazo bak'on ta ya iso. Sit room d'in Dad na bak'i aka saukar dashi shi da wani friend d'in shi, hakan ta je suka gaisa, nan ya Isar da sak'on k'ok'on baran shi zuwa gare ta kuma ba laifi ta yi na'am dashi, nan yake ba ta labarin tun lokacin da ya fara son ta da kuma shakkar tunkarar ta kamar bazai yi nasara ba, da hakan hira ta 6arke tsakanin su.

Lokacin da zai wuce ne ya nemi tayi mai iso ga iyayen ta domin ya gaisa dasu, gidan ta shiga ta yi masu bayani sannan ta fito ta yi masu iso, bayan sun shiga falon ne suka gaisa da mahaifin ta, inda ya yaba da hankali da nutsuwar yaran kuma yana ganin y'ar shi ta dace.
    D'akin ta doso sanadiyyar y'ar ta data matsa sai ta zo sun gaisa da sirikin nata, suna had'a ido take gaban su ya bada rasssss!.

.,,..........
     Cikin azama ya zabura da k'arfi tamkar wanda ya zauna dama saman allura, wannan dattijuwar fuskar ba za ta ta6a 6ace mai ba.

"Koma ka zauna, ina zaka je?".

Nan ya gagara bata amsa saboda irin tsabar rud'ewar da yayi, cikin murmushin ta dake k'arawa kamilallar fuskar ta fara'a ta nemi guri ta zauna, "a cikin Ku waye sirikin nawa?". Farouk ne ya nuna Fadeel da yatsa yana mai Sosa kai.
       Shi ko Fadeel ji yake yi tamkar k'asa ta bude yanitse a gurin, tsabar jin nauyi duk da a wancan lokacin ya bata hak'uri.

Kawai ganin shi suka yi durk'ushe gaban ta yana mai k'ara neman yafiyar kuskuren da yakusa tafkawa. Har ga Allah bata so hakan ba, kuma ba don hakan da ya yi ba to tayi alk'awari baza ta fad'awa kowa abinda yafaru ba, amma sai gashi yana batun bayyana kanshi.

Mamaki ne k'arara a fuskar sauran mutanen da ke falon, kowa alamar tambaya fal a fuskar shi, muryar Mum ce ta daki dodon kunnen su yayin da take furta, "wannan abin ya riga ya wuce a guri na, kuma na d'auki faruwar hakan silar abubuwa da dama, saboda ta nan ne na samu sirika data zamo alkhairi a cikin iyali na, kuma ta hakan ne Allah ya had'ani da siriki na", nan ta k'arashe maganar cikin murmushi.

Fadeel ne ya tayar da kai ya kalle ta, sannan ya kuma nok'e kai, alamar tambaya ta hango fal a fuskar shi. "Wannan yarinyar dai yanzu haka tana gidan nan matsayin matar yaro na".

Daram! Ya ji gaban shi ya buga saboda jin Zajlah na gidan, duk da ya dad'e da cire ta a ran shi saboda hango irin nisan da ta yimai na tabbatar da ta yi aure.
        "Ni fa bangane ba sai wata magana kuke yi a dunk'ule wacce mu bamu fahimci ina kuka dosa ba, dama kinsan sirikin na ki ko yaya?", Dad ne ke yiwa Mum wannan tambayar.

Hakan ne ya sa ta kwashe abinda ya faru tsakanin ta da Fadeel ta gaya masu, inda jikin kowa ya yi sanyi musamman Saudat da tasha jinin jikin ta tana jiran ko ta kwana, amma ita gaskiya tunda bai kai da marin mahaifiyar ta ba tana son shi a hakan don ta hango nadama k'arara a fuskar shi, amma dai za ta jira taji daga iyayen ta.

"Kar ka damu kanka akan wannan abin, saboda zan iya cewa wani wa'azi ne na daban ya sauka akan mu duka, don yaro na bai wuce sati da marin wani dattijo ba muka yi karo da kai, kaga ko naka mai sauk'i ne akan na shi".

"Yanzu muna lokacin da y'ay'an masu kud'i basu cika d'aukar talakan mutum da wata k'ima ba, ko kuma sun d'auki cewa dukiyar su za ta sa su taka mutum son ransu kuma su taka banza, suna ganin bashi da wani tsayayye ko kuma a'ah bai da k'imar da za su dube shi da gashi tunda yana talaka".

"Shin shi yayo kan shi talaka? Ko kuma shi ya rok'i Allah yabar shi hakan? Ko kuma wani laifi ya yiwa ubangiji shiyasa ya barshi hakan?, ko d'aya, iko ne da kuma banbancewar ubangiji tsakanin bayin shi".

"Ni dai ina mai shawartar Ku da girmama mutum ko da ko baku San inda ya fito ba ta hakan na Ku iyaye za su yi daraja ko a bayan idon Ku, kuma indai ni na haifi Saudat na baka ita halak malak", tana duban Dad ta furta hakan.
     Sannan ta d'ora da cewa "Dadyn Alamein Allah yasa ban yi kaud'i ba", tana maganar tana murmushi.

Jikin kowa sai da ya mutu a falon, saboda yanda Mum bata d'auki lamurran duniya a bakin komai ba, da wata ce tabbas da hakan za ta gilma Katanga tsakanin Saudat da Fadeel.

"Ba komai Mumyn Saudat, Allah ya tabbatar mana da mafi alkhairin sa", fad'ar Dad kenan da shi ma yake magana cikin sanyi jiki had'e da jin dad'in yanda Allah ya bashi mata mai hankali da nutsuwa, lallai tabbas ya yarda da akace in Allah ya baka mata ta gari to ka samu rabin addinin ka sai dai ka cika rabin tsakanin ka da ubangijin ka, kuma sai yanzu yake hango illolin gatan da ya yi nuna wa yaran shi don yasan ba don ita ba da yanzu gidan shi ya rushe gaba d'aya.

"Ku tashi ku koma sit room ku k'arasa zancen ku, siriki na Fadeel a gaida gida". Nan dai suka fahimci Mum Mace ce mai son raha.

Da hakan suka koma sit room suka cigaba da hirar su sai yabon Mum Fadeel da Farouk ke yi, inda ita ko Saudat ke jin dad'in yabon da akewa mahaifiyar ta.

**********

Yana falo yana kallo Zajlah ta shigo ta zauna saman d'ayan kujera sannan ta yi mai sannu da hutawa, bai amsa ba kawai ya taso ya zo saman kujerar da take zaune ya zauna.

"Ba ni aron wayar ki zan d'an yi wani abu da ita". Jin ya matse ta har cinyoyin su na gugar juna ya sa ta mik'a mai wayar, a zaton ta ta shi zai yi sai ga shi ya k'ara gyara zama, xender d'in wayar ta ya bud'e ya kamo pix d'in ta da Saudat ta d'auke ta kwana biyu da suka wuce, saboda in bata manta ba ranar ta dame ta da zolayar cewa ta had'u shiyasa ta matsa ta yi mata pix d'in.

Tsam ta zabura daga gurin ta koma d'akin ta falo ta kwanta saman kujera, sai mamaki take yi yanda yake shisshige mata kwanan nan, da kuma son kusancin shi da ita, duk yanda take kauce mai sai ya sako ta a lamurran shi, wanda ita ko ko kad'an bata son hakan.

(Tau fa Alamein sunan ka sorry, ni dai Jegal na tausaya ma daka bari Zajlah ta gano lagon ka).

    Alamein sosai yana ganin cigaba a cikin kasuwancin shi, abin kawai sai dai hamdala don yanzu ne yake jin shi mutum kamar kowa kuma yake sanin ya lamurran duniya ke tafiya. Haka kawai ya ji yana sha'awar siyo ma Zajlah wani abu saboda kyautata wa tsakanin su, musamman yanzu da yake ganin cewa da bazar tace yake rawa, in ya tuna cewa tun auren su kawo yanzu bai ta6a siyen wani abu ya bata ba har kunya yake ji, dai-dai da cefanen gidan bai san ya yake tafiya ba, ita ke yi ko Mum bai sani ba, tabbas yanzu yasan cewa ba k'aramin gata Mum ta yi mai ba, gashi duk abinda suke tak'ama dashi sun rasa lokaci d'aya amma gashi ADALILIN GATAN da Mum ta yimai na aura mai nagartattar mata basu shiga k'unci sosai ba, ba abinda yake so irin ya tsokane ta ta dinga fad'a tana cuno baki, wai ita a dole an ta6a ta, yanayin ta da yanayin maganar ta na burge shi, a hakan ya wuce B.L.B plaza ya yi mata siyayya sannan ya hau hanyar gida.

Da sallamar shi ya shiga gidan lokacin tana kitchen tana girkin dare, direct ya risk'e ta kitchen d'in, nan ta yi mai sannu da zuwa sannan ta juya ta cigaba da aikin ta.

"Ga wannan na siyo maki Zajlah", yanda ya furta sunan na ta ne yasa tsigar jikin ta tashi, ji take yi duk duniya ba wanda ya kaishi iya furta sunan ta. Ta so ta share shi kuma zuciyar ta ta kasa juren hakan, wai me yasa kwanan nan kusancin da yake yi da ita yake janyo mata jin wasu abubuwa a tattare da ita?, ko fita ya yi yanzu har matsuwa take yi bai dawo ba, tana so ta gansu guri d'aya yana tsokanar ta hakan na mata dad'i duk da ba wata doguwar hira ke had'a su ba.

Hannun ta ya kama ya damk'a mata ledar da ya shigo da ita, daga hakan bai saurare ta ba ya yi part d'in su Mum. Acan ne Mum take bashi labarin ashe mai neman Saudat ne suka yi karo ranar, nan ta zube mai yanda suka yi daya zo gidan, jikin shi ne ya yi sanyi da hakan had'e da al'ajabin wannan lamari, lallai tabbas Allah mai juya lamurran shi ne yanda ya so, yana nan suna hira da Mum ta k'are girkin ta ta shigo part d'in rik'e da kula data sako ma Dad tuwon semovita da miyar agushi ta ji kifi.

"K'arasa ciki ki kai mai y'ar albarka", cewar Mum kenan, da hakan ta wuce d'akin Dad saboda inda sabo yanzu kam ta saba don har zama take yi su yita hira ita dashi, bayan ta kai mai ne ta dawo falon lokacin Saudat ma ta fito nan suka baje ana ta hirar yanda auren Saudat zai kasance.

Kiran magrib ne ya tada kowa daga gurin domin gabatar da farali, part d'in su suka wuce inda ya yi alwala ya wuce masallaci ita ko ta fad'a na ta d'akin domin sauke farali.

*********

Bai shigo gidan ba sai da ya yi sallar isha'i sannan ya wuce ya yiwa Mum sai da safe ya koma part d'in su, abinci ya tarar a dining table kamar kullum amma bai ji motsin taba, hakan ya sa ya fad'a d'akin ta.

Zaune take saman sallaya tana karatun K'ur'an cikin k'ira'ar ta mai sanyi da kuma dad'in saurare inda take karanta suratu Luk'man. Saman katifa ya je ya kwanta yana sauraren ta har ta kai matsaya ta ajiye K'ur'anin sannan ta yi addu'o'in ta ta shafa inda shi ma Alamein ya taya ta shafawa.

Sallayar ta ninke ta ajiye ta had'a K'ur'anin ta da littattafan ta na azkar ta ajiye, sannu da zuwa ta yi mai wanda bai ko samu damar amsawa ba sai fararen idon shi daya bi ta dasu.

Towel ta d'auka ba tare data cire kayan jikin ta ba ta fad'a toilet, jimawa ta yi gurin wankan saboda ba taso ta fito ta tarar dashi a d'akin.

D'aure da towel sanye da hijab d'in ta ta fad'o falon sai kuma ta ja ta yi turus sanadiyyar ganin inda ta barshi bai tashi ba, sai ma wayar ta daya janyo yana latse-latse, basarwa ta yi ta wuce saman kujerar ta da take d'inki ta janyo jakar kayan kwalliyar ta tana shafa mai.

Tausayin ta ya ji ya tsirga mai, ba akan komai ba sai don ganin kowace Mace mai ji da kanta in tayo wanka saman mirror take zama ta yi kwalliya sa6anin ita data zauna saman kujerar keken d'inki.

Jin shi kawai ta yi ya rik'o jakar yana mayar da kayan cikin jaka, sannan ya rik'o hannun ta ya ja ta sai d'akin shi, galala ta saki baki ta bishi tamkar rak'umi da akala, bai tsaya ba sai gaban mirror d'in shi, ita ko ya janyo kujerar ya zaunar da ita, "daga yau ga gurin kwalliyar ki kuma ga d'akin ki", daga hakan ya juya ya koma d'akin ta.

Akwati nan ta ya janyo yayo d'akin shi dasu, baki kawai ta saki tana kallon shi har ya gama kwaso kayan ta kaf ya kawo d'akin nashi, har lokacin bata samu motsawa daga yanda ya ajiye ta ba.

"Bara in maki kwalliyar in ba zaki iya ba", kayan ya fitar na kwalliyar ta ya jera saman mirror d'in, kiciniyar cire hijab d'in ta ya rik'a yi hakan ya sa ta daddafe jikin ta, tana rok'on shi yabari ta kimtsa da kanta.

D'akin ta ya koma domin ya bata guri ta samu sakewa, saman katifar ya kwanta yana kallon videos na d'aurin d'ankwali.

Mamaki ne ya ishe ta na Alamein, tamkar ba shi ne yake hantarar ta yana kira mata dak'ik'iya kuma jahila ba, da mamakin shi fal a ranta ta kimtsa ta saka riga da siket d'in ta na atamfa sannan ta fito domin taci abinci.

Motsin da ya ji falo ne ya tabbatar mai da fitowar ta, hakan ya fito daga d'akin ya ganta zaune falon su ta saka filet d'in abinci tsakiya tana ci. Hannu ya saka suka rik'a cin abincin tare, sai satar kallon ta yake yi yanda yake ganin take tsantsara kwalliya kamar wacce ta shiga makarantar make up, gano cewa neman magana yake so ya sa ta k'yale shi har suka cinye abincin, na shi dake saman dining table ya d'auko ya zuba suka koma ci, da hakan ta tashi ta wanko hannun ta sannan ta fad'a toilet ta yo brush, d'akin shi d'in ta zauna saman kujera bayan ta d'auko wayar ta ta kunna data ta hau whatsap.

Da hakan ya risk'e ta tana charting ya fad'a toilet ya yi wanka, d'aure da towel ya fito inda take satar kallon shi, mutum ne dogo ba sosai ba mai faffad'an k'irji sai dai ba za'a ce mai mai k'iba ba kuma baza'a ce mai siriri ba, fari ne ba sosai ba yana da hanci har baka, sajen fuskar shi ke k'ara fitar da kyawon shi had'e da fararen idon shi tamkar madara, sumar kan shi bak'a ce wulik ta kwanta tamkar ta Fulani, ya fi yanayi da larabawan Sudan.

Firgigit ta dawo hayyacin ta sanadiyyar ruwan kanshi daya sharto mata a fuska, cikin jin nauyi ta nok'e fuskar ta tana latsar wayar ta, "ko in zo ki taya ni Shafa mai ne, na ga hankalin ki ya tafi a kallo na, kinga sankacecen saurayi", yana maganar ne cikin zolaya da kashe mata ido d'aya, still kasa tayar da kan ta ta yi sanadiyyar kama ta da ya yi tana yi mai kallon k'urilla (Zajlah kar ki bada irin su Anty Sis, Hauwa Jidderh, Salmatun Innah, Namcy Sardeeyer, da Wamsyl, masu cewa sun matsu Alamein bai shigo hannun ki ba, toh fa ko reshe ne zai juye da mujiya ke ki shiga tarko?, _lolx_).

Turare kawai ya fesa ya saka jalabiyar shi mai ruwan anta, ya hau gado ya kwanta, ita ko ta jona wayar ta a charge ta kwanta saman three sitter.

"Wannan ne kuma baki isa ba, saboda haka ki taso ki dawo saman gadon ki kwanta, ba wani abu nace zan maki ba".
    Ji rainin hankali, to me tace zai mata, ina ga in na k'yale wannan mutumen rainin zai yi yawa, cikin zuciyar ta take wad'annan maganganun.

Gaban ta kawai ta ganshi yana batun sunkutar ta, da hannu ta yimai alama sannan ta kalle shi sama da k'asa "ina ga ka hutar da kanka da shiga mu'amalar kucaka kuma jahila, saboda gudun kar ta6on ta ya shafe ka".

Daga hakan ta juya ta bashi baya ta yi kwanciyar ta. Tamkar gunki haka ya dask'are a gurin, lallai tabbas magana zarar bunu ce, kuma yana da tabbacin watarana za ta maida mai amsa, wannan ba damuwar shi bace indai za ta hak'ura ta yafe mai laifin shi a gare shi, hakan dai ya ja jiki ya je ya kwanta.

********

Yau ne aka d'aura auren Saudat Kabeer Aminu da Fadeel Ibrahim mai dala, inda aka yiwa Saudat abubuwa cikin tsaka tsaki na masu rufin asiri, sai dai fatar d'orewar zaman lafiya.

Sai ranar da aka kai tane Zajlah tasan Fadeel ne da ya ce yana son ta, tuna abinda ya faru tsakanin shi da Mum ne yasa jikin ta ya k'ara sanyi da lamurran duniya had'e da ikon ubangiji.

.............

       Yau ne mummunan labari ya risk'e su cewa Allah ya yiwa Alh Ibrahim rasuwa akan hanyar shi ta zuwa Abuja daga sokoto ya yi hatsari, inda suka jajanta abin had'e da yimai murnar sauke nauyin marayin Allah dake saman kanshi, addu'a suka yi mai inda Mum taso ko Alamein ne yaje, sai dai a labarin shi bai gaya masu takamemen address d'in gidan suba, Allah ya gama rai da gafara, Amein.

*******

6angaren Baban Zajlah yana ganin bud'i a kasuwancin shi saboda yanzu shine shugaban masu kayan gwari, don ya daina kasawa a table sai buhu-buhu da yake d'aukowa ana siya gare shi, amincin su sai k'ara k'arfi yake yi tsakanin shi da Malam Inuwa sun zamo tamkar y'an uwa na jini.

*********

Cikin Salmat yanzu ya kai wata bakwai, yanzu laulayi ya rage sai d'an banzar kwad'ayi dake taso mata inda Imran ke tarairaya da ita tamkar k'wai.
    Yusrah na mak'ale da na tacikin d'an wata biyu wanda ba kowa yasan da zaman cikin ba saboda ba wahala yake bata ba.

*********

Alamein ne zaune k'asa dirshan inda Zajlah ke zaune saman kujera tana fuskantar shi sai wani cin magani take yi, ta yi wanka ta ci ado tamkar wacce za ta je bikin aure sai cingum take tauna yana bada k'as-k'as.

"Bazan iya jure wannan garawar da kike min ba, Zajlah nasan ni mai laifi ne a gare ki, amma na yi ta baki hak'uri kin k'i ki hak'ura".
   "Tun farko wallahi bansan miye "So" ba ban ta6a tsayawa na yi magana da mace ta minti uku ba, a wancan lokacin na saka ma raina tsanar mace ne ba akan komai ba sai don ganin yanda suke taka rawa a ta6ar6arewar rayuwar d'a namiji cikin shu'uman cin su".

"Bazan manta ba muna farkon shiga university mu hud'u muke tare, Salis, Imran, Salim sai ni Alamein, duk wanda ya san mu tare yake ganin mu, bamu shiga sabgar kowa karatun mu kawai muka saka ma gaba.
    Akwana a tashi Salim ya had'u da wata yarinya da ake cema Hafsat inda soyayya ta shiga tsakanin su, ganin rayuwar shi ta fara sauyawa muka nemi raba shi da ita saboda ya kula da karatun shi gashi maraya amma abin ya gagara, saboda y'ar mai kud'i ce yarinyar kuma gwargwado tana sakar mai kud'i, daga hakan ta ja ra'ayin shi suka rik'a holewa har ya zamo tamkar miji a gare ta, hakan ya yi silar muka tsame kan mu daga lamurran shi, wallahi tun daga lokacin na k'ara tsanar Mace a rayuwa ta".

"Tabbas nasan ina da tak'ama da ji da kai, amma ba na saka Mace a tsarin rayuwa ta kwata-kwata, kuma kiyar da dacewa kece first love d'ita kuma last insha Allah, wannan horon da kike yimin ya yi tsanani don Allah ki sassauta min", hakan ya k'arashe maganar yana rik'e da hannun ta har da guntun hawayen shi.

Tabbas ta tausaya mai, amma ita miye na ta ciki na hantara da hwulak'antarwa, tunda ita ma ba ita tace tana son shi ba, kawai daga sama akace an mata miji, me zai hana yayi wa iyayen shi biyayya ko da bai son ta ya shafa mata lafiya kowa tashi ta fisshe shi.

Yatsun hannun tane da yake murza wa ya sa ta fincike hannun ta ta mik'e ta yi d'aki, key ta murd'a ta yi zaman ta d'akin.
    Har ga Allah tasan tana son Alamein kuma shine kalar namijin da take so tun bata san miye "So" ba tsayayyen namiji ke burge ta, sajen fuskar shi da dara-daran idon shi ke k'ara d'aukar hankalin ta zuwa gare shi, amma tabbas sai ta nuna mai darasi sannan za ta bada kai bori ya hau.

Tsam ya tashi ya yi part d'in Mum, saman kujera ya zube ya yi kwance hannun shi d'aya ya yi matashi dashi d'ayan kuma ya dafe kanshi inda har jiyojin kanshi sun tashi rad'o-rad'o.
     Mum ce ta fito daga d'akin Dad ta risk'e shi hakan, tafi minti uku saman kanshi bai ma san tana nan ba. Tabbas kwanan nan tana lura da takon shi tsakanin shi da Zajlah, tasan ba komai ne ke wahalar da shi ba sai "Son" Zajlah dake d'awainiya dashi, saboda yanda yarinyar ta k'ara fresh yanzu ga wayewa dake shigo mata kad'an-kad'an, inda ko Mace y'ar uwar ta ta ganta cikin kwalliya sai ta k'ara kallon ta barranta na namiji, da hakan ta yi alk'awari ba za ta ta6a nuna mai ta fahimci matsalar shi ba, sai Zajlah ta gama gara shi ta sauko don kanta.

Hannun shi da ya rufe fuskar sa dashi Mum ta janye had'e da furta "waini Son kwanan nan me ke damun ka?, duk sai in ganka tamkar kana cikin damuwa, ko gurin kasuwancin ne?".

Ji ya yi tamkar ya gaya mata me ke faruwa ko za ta taya shi shawo kan Zajlah, sai dai kuma yana tunanin ko ya gayawa Mum ba lallai ne ta bashi had'in kai ba, tana ma iya basarwa da tuna mai baya.

"Ba komai Mum yanayin rayuwa ne kawai, a dai taya mu da addu'a", "toh Allah yashige mana gaba, kaima ka dage da addu'a".

Bayan ya amsa ne ya ji kuma zaman ya gundire shi ya tashi ya yi part d'in su, wanda har lokacin Zajlah na d'aki bata fito ba. D'ayan d'akin ya fad'a ya shiga toilet ya sakarwa kanshi ruwa, sai da ya yi wanka ya fito ba kayan sakawa suna d'akin da Zajlah take, k'ofar yaje yana bugawa had'e da magiyar ta bud'e zai d'auki kayan shi, hakan ya sa ta fito ta bar mai d'akin ta dawo falo.

................

    Duk mahaluk'in da ya ga Alamein yasan cewa yana cikin damuwa, saboda har y'ar rama ya yi kuma ya tara wani uban saje a fuskar shi da ya maida shi tamkar wani Sabon shigar hauka.

Ba k'aramin tausaya mai Mum ke yi ba sai dai kuma tana ganin in har tace za ta saka baki a maganar su tamkar ta so kanta dayawa, kuma in za ta duba bata San iya muzguna warda ya yi yiwa ita Zajlan ba har aka kawo yanzu, kuma a 6angare d'aya ta fi so Zajlah ta garashi saboda yasan darajar ta.

Abincin rana ta gama ta kawo ta ajiye, amma ga mamakin ta yanda ta ajiye na safe hakan ta tarar da shi, mamaki ne fal a ranta saboda yanzu suna wasar y'ar 6uya tsakanin su in yana d'ayan d'akin to itako za ta koma d'ayan.
     D'akin da yake ta tunkara, har ta rik'a k'ofa za ta murd'a kuma ta fasa, saboda a tunanin ta in tayi hakan ta bada kanta, sai kawai ta dake ta koma d'ayan d'akin ta yi kwanciyar ta, whatsap ta hau amma duk da hakan zuciyar ta tak'i natsuwa guri d'aya, hankalin ta d'ayan na gurin me yasa yau bata ga Alamein ba.

*********

A daddafe ta kai la'asar bayan ta yi sallah ta fito domin d'ora girkin dare, still duka abincin ba abinda aka ta6a, cikin rawar jiki ta fad'a d'akin, can k'asa gurin gado ta ganshi zube male-male cikin amai yana dafe da cikin shi, da saurin ta ta kai gurin ta tallafo shi duk jikin shi ya saki.

Toilet ta nufa domin samo ruwa da towel ta gyara mai jikin shi amma ya rik'e ta gam ya hana mata tashi, "Zajlah ki yafe min laifi na zuwa gare ki, inason kisan cewa ko da ta Allah ta kasance a gare ni to na tafi da d'inbin K'aunar ki a zuciya ta, ina sonki kuma bazan daina son ki ba har k'arshen rayuwa ta".
     Wani tari ya rik'a yi mai had'e da majina da jini-jini daga hakan ya some a jikin ta. Wata k'ara ta saki ta fito a guje sai part d'in su Mum, koda ta shiga tana zaune falo da remote a hannun ta tana kallon tashar Manara T.V. jin kawai ta yi mutum ya fad'o mata, "wayyo Mum Alamein ya mutu, Mum ki tausayamin kar in rasa shi, Mum ki gaya mai wallahi ina son shi nima".

Sambatu kawai take saki wanda ta kasa yiwa Mum takamemen bayani kan abinda ke faruwa. Remote d'in ta ajiye ta ja hannun ta suka koma part d'in, ko Mum data ganshi a hakan ba k'aramar razana tayi ba, saboda har ga Allah ta zata bashi da rai.
    Da saurin ta ta doshi gurin ta tallafo shi, inda Zajlah ke ta shar6ar kuka tana gunza, "yi sauri bani ruwa a cup".

Fridge ta bud'e ta d'auko ruwa ta bawa Mum ta koma gefe ta raku6e sai gaban tane ke dukan uku-uku. Ruwan Mum ta watsa mai a fuska saboda tabbacin yana raye suma ne ya yi, firgigit ya motsa dafe da k'asan marar shi sai hawaye ne ke yi mai zuba.

"Mum kice wa Zajlah ta so ni kamar yanda nake son ta, Mum wallahi na gano kuskure na, zan iya rasa rayu.....".
    Mum ce ta rufe mai baki, sannan ta kai duban ta ga Zajlah da ta nok'e kan ta tamkar wata marar gaskiya, "ki kula da mijin ki", hakan kawai ta furta ta bar masu falon, saboda dama tasan duk "So" ne ke d'awainiya dasu amma kowan nen su na basarwa a dole bai son d'ayan ya fahimci hakan.

K'arasowa tayi gurin shi had'e da tattara kayan da ya yiwa amai ta kai toilet ta wanke sannan ta had'a mai ruwan wanka ta fito, taimaka mai ta yi ya shiga wankan, ko da ya fito ta kimtsa d'akin ta fesa turare, sannan ta had'a mai tea mai kauri.

"Sannu ya jikin?".
"Da na mutu ai kin huta tunda ba damuwa kika yi dani ba", cup d'in da ta had'a mai tea ta mik'a mai ya kar6a ya ajiye gefe, gaban ta ya zo ya gurfana had'e da rok'on ta gafarar abinda ya aika ta mata a baya.

Bata San lokacin da ta rik'o hannuwan shi ba alamar ya tashi sai da ta ji ya fad'o mata ragwaf saman jiki, yunk'urin janyewa ta yi had'e da furta "wash! Hannu na", hakan ta sa ya yi saurin zabura, da saurin ta ta koma saman kujera tana dariya had'e da yi mai gwalo.

Cup d'in ya rik'a sannan ya dawo kusa gare ta ya zauna, baki ya bud'e zai yi magana ta yimai alamar yasha tea d'in sannan su yi magana.
   Hakan ya shanye tass ya ajiye sannan ya tattara dukan hankalin shi zuwa gare ta yana wasa da jelar gashin ta, "Zajlah plxxxx kice kina so na", cikin kasalalliyar murya ya furta hakan.

"Ai Kaine baka "So" na, amma ni tun farko ban ta6a jin k'iyayyar ka a rai na ba, sai dai kai da kake ji tamkar ka hasa wuta ka.......".
  Bai bari ta k'arasa ba ya dafe mata baki da hannun shi, "ki yarda ni kaina ban ta6a jin k'iyayyar ki ba, sai dai rashin son kula mata da baya gaba na".

"To yanzu gaya min wane irin kalar so kake yi min".

"Ni ba son ki nake yi ba K'aunar kice da ta dabai baye ni take batun mayar dani wani zautacce, saboda K'auna ba ta ta6a canja wa, So kuma wataran zai iya canjawa".

Hira suka shiga sosai kowan nen su na nunawa juna irin yanda yake jin shi a ranshi, wanda ta kai tun suna saman kujera har suka koma saman gado (ni dai Jegal k'ofa na ja masu na fita, su Aunty Sis sunan Ku sorry Zajlah ta lula a duniyar ma'aura ta, kunsan ance tsakanin mata da miji sai Allah, _lolx_).

............

      Kiran sallar magrib ya dawo dasu hayyacin su, inda Zajlah sai wata shagwa6a take mata zuba mai, wanka Alamein ya fad'a sai da ya fito sannan ya had'a mata ruwa ya taimaka mata ta yi wanka, ganin lokacin sallah ya kusa shigewa ya sa ya jasu jam'i suka gabatar da farali suka d'ora da nafila sannan suka jero addu'o'i, basu tashi daga gurin ba sai da suka gabatar da isha sannan Zajlah ta ja jiki ta koma saman gado ta k'udun-dune, gadon shi ma ya hau yana tsokanar ta had'e da saka mata albarka.

Daka kalli fuskar shi za Kasan cewa yana cikin farin ciki, walwala had'e da nishad'i, "ya dace in fita in sawo maki kazar ki ta amarci amma kuma duk kin d'ibge min jiki".

Ido ta gwalo waje alamar mamakin maganar da ya furta, kashe mata ido d'aya ya yi sannan ya furta "ko k'arya nake yi?, ni da ke jinya ko k'arfin jiki bani da".

Kunya ce gaba d'aya ta lallu6e ta dole ta nok'e kan ta had'e da k'udun-dune wa cikin blanket, hakan ya sa ya zira jalabiyar shi ya zari key d'in mota ya fice daga gidan.

Fitar shi ya sa ta yaye bargon da ta lullu6a dashi ta ja jiki sai toilet, jikin ta ta k'ara gasawa sannan ta fad'a kitchen, indomie ce ta dafa masu da ta ji kifin gwangwani, tana juyewa a kula ta ji motsin shigowar shi, a falo suka had'u ta d'auko kular abincin za ta kai dining, shi ko yana rik'e da ledoji a hannun shi, da Sauri ya saki ledojin da ke hannun shi ya taryo ta, kular ya kar6a sannan ya rik'o hannun ta suka k'arasa falon, sai da ya ajiye ta saman kujera sannan ya ajiye kular abincin k'asa, ledojin ya koma ya d'auko ya wuce kitchen ya had'o da plates had'e da spoon.

Sai da ya ajiye kayan sannan ya kai duban shi zuwa gare ta "wa yace kiyi girki yanzu?, in je kawai in dawo ke ce makuku har kin fad'a kitchen", yana maganar ne da murmushi d'auke a fuskar shi tamkar gonar auduga.

"To in banyi girki ba me kake so muci?, ko mu kwana da yunwa kake so?, ni da ma ka maida ma ciki tamkar an yimin yaso".

Suna had'a ido ta nok'e kan ta tana murmushi, "yarinya za kiyi bayani ne".
   Daga hakan ya fitar da kaza biyu da fresh milk sai wani take away dake da ferfesun y'an ciki daya siyo B.L.B, baki ta saki tana kallon shi had'e da furta "da mu da wa way'annan kayan?, ka d'auki kaza d'aya ka kaiwa su Mum".

Ido ya gwalo waje yana kallon ta, "wato so kike in bayyana kaina gurin Mum", dariya ta yi sosai sannan ta ware d'ayar ta bashi ya saka a fridge gobe a d'imama akai masu, saboda ita ma tasan baza ta iya zuwa part d'in ba yanzu.

Da hakan suka ci suka k'oshi, sannan suka dasa baben hira da nunawa juna kula wa tamkar sa had'iye junan su, sai k'arfe *11:30pm*sannan suka kwanta.

************

Kwanaki sun shud'e watanni ma haka, inda yau ne Zajlah ke ta shirye-shirye tun safe kan zuwa sunan y'ar da Salmat ta haifa, akwati d'aya suka had'a ita da Alamein na kayan jinjiri da kayan amaryar k'arni, saboda yanzu gwargwado hanyar samu na k'ara bud'ewa Alamein a cikin kasuwancin shi, tun *08:00am* ta kammala aikin ta take ta tayar da Alamein kan ya tashi ya sauke ta gida ya k'i sai juyi yake yi saman gado, dabara ta fad'o mata ruwan sanyi ta d'ebo ta yayyafa mai a fuska, yana tashi ya janyo ta saman gadon sai da ta yi ta had'ashi da Allah sannan ya sake ta ya d'auko key suka fice.

Gidan su Salmat cike yake da y'an suna, Yusrah, Saudat, Zajlah sun kammalu gidan inda akayi taron suna aka watse kowa yaci ya k'oshi sai dai fatar Allah ya raya Mus'ab, sai dare sannan kowannen su mijin shi ya zo d'aukar shi suka wuce.

*************

Bayan sati biyu ne da sunan Salmat tana kitchen tana tafashen kayan ciki za ta d'ora girki ta fito aguje wurin toilet d'in su na tsakar gida tana lezaya amai tamkar za ta had'o da hanjin ta, k'arar aman ta ne ya ankarar dashi ya fito da sauri, taimaka mata ya yi ta wanke bakin ta sannan suka koma falon. K'amshin tafashen naman na bugun hancin ta ta k'ara fitowa tana wani aman.

"My Zaz me kika ci hakan yake ta sakaki amai?", a rud'e yake jero mata tambayar, gaya mai ta yi ya kashe risho d'in ya kawo mata gyalen ta za ta shiga gurin Mum, hakan ya kawo mata suka wuce part d'in Mum gaba d'ayan su.

Gaida Mum kawai suka yi ya jefo mata maganar "Mum kinga My Zaz sai amai take ta lezawa har ta kasa zama part d'in mu".
     Duban ta ta maida ga Zajlah sannan ta ce' "me ke damun ki halan?", duk da tana zargin shigar ciki ne da ita, amma tana so ta tabbatar da zargin ta.

"Mum tafasar nama ce ba naso shiyasa", murmushi kawai ta yi had'e da yi mata Allah ya sauk'ak'a sannan ta d'ora da cewa "sai ki ajiye girkin har zuwa lokacin da cikin zai yi k'wari, in yaso a rik'a baku anan".

Kunya ce ta kori Zajlah ta yi d'akin Mum ta bar su ita da Alamein, don dama tana zargin cikin saboda watan ta biyu bata ga al'adar ta ba.
    Bayan ta d'aga ne Alamein ke ta damun Mum da tambayar abinda ke faruwa, nan ta gaya mai ciki ne da Zajlah d'in. Kan murna bai tsaya ta k'arasa bayanin ta ba ya fad'a d'akin Mum d'in don nuna wa Zajlah tsabar murnar shi.

********

Akwana a tashi ba wuya a gurin ubangiji, saboda Yusrah ita ma ta sauka, sai dai abinda ta haifa bai zo da rai ba, sanadiyyar hakan yasa Imran ya hana ta zuwa gida wankan jego, dole cikin dangin mamar ta aka tura mata wata domin kulawa da ita yanda ya dace.

********

Dak'yar ya barta ta je barkar Ummulkhairi matar Ustaz Lukman, saboda a cewar shi yana kishin ganin ta tare da Ustaz d'in, "banda abinka *HUBBY* ni da zanje barka me zai had'i na da Ustaz?, wai ma tsaya wa ya gaya ma Ustaz Lukman ya yi "So" na?", da mamaki fal a ranta ta jefo mai tambayar.

Sai da ya k'ara had'e fuska sannan ya yi mata bayani kamar haka, "lokacin ciwon Dad kinsan su ke zuwa yiwa Dad addu'a, to nan ne Ustaz Yusuf ke yimin nasiha kan in rik'e ki da kyau, saboda ke Mace ce mai hankali da nutsuwa kuma nayi dace, inda har yake gaya min da yanzu Ustaz Lukman ne mijinki, ba don ma yana kula da mahaifi na ba gaskiya da na sallame shi wancan lokacin, saboda dana kalle shi wani k'unci nake ji".

"Su kishi manya, to ni dai tashi muje ba dad'ewa zan ba sai ka jira ni mu dawo tare", da hakan suka fice domin zuwa barkar.

Share this

WhatsApp